[The following text is taken from Olle Qvarnström: The Yogaśāstra of Hemacandra. A Twelfth Century Handbook on Śvetāmbara Jainism. Harvard Oriental Series, Volume 60, which see for translation and critical notes.]

Hemacandra: Yogaśāstra, XII

¹śrutasindhor gurumukhato yad adhigataṃ tad iha darśitaṃ samyak |

anubhavasiddham idānīṃ prakāśyate tattvam idam amalam ||

² iha vikṣiptaṃ yātāyātaṃ śliṣṭaṃ tathā sulīnaṃ ca |

cetaś catuḥprakāraṃ tajjñacamatkārakāri bhavet ||

³ vikṣiptaṃ calam iṣṭaṃ yātāyātaṃ ca kim api sānandam |

prathamābhyāse dvayam api vikalpaviṣayagrahaṃ tat syāt ||

⁴ śliṣṭaṃ sthirasānandaṃ sulīnam atiniścalaṃ parānandam |

tanmātrakaviṣayagraham ubhayam api budhais tadāmnātam ||

⁵ evaṃ kramaśo ’bhyāsāveśād dhyānaṃ bhajen nirālambam |

samarasabhāvaṃ yātaḥ paramānandaṃ tato ’nubhavet ||

⁶ bāhyātmānam apāsya prasattibhājāntarātmanā yogī |

satataṃ paramātmānaṃ vicintayet tanmayatvāya ||

⁷ ātmadhiyā samupāttaḥ kāyādiḥ kīrtyate ’tra bahirātmā |

kāyādeḥ samadhiṣṭhāyako bhavaty antarātmā tu ||

⁸ cidrūpānandamayo niḥśeṣopādhivarjitaḥ śuddhaḥ |

atyakṣo ’nantaguṇaḥ paramātmā kīrtitas tajjñaiḥ ||

⁹ pṛthagātmānaṃ kāyāt pṛthak ca vidyāt sadātmanaḥ kāyam |

ubhayor bhedajñātātmaniścaye na skhaled yogī ||

¹⁰ antaḥpihitajyotiḥ saṃtuṣyaty ātmano ’nyato mūḍhaḥ |

tuṣyaty ātmany eva hi bahirnivṛttabhramo jñānī ||

¹¹ puṃsām ayatnalabhyaṃ jñānavatām avyayaṃ padaṃ nūnam |

yady ātmany ātmajñānamātram ete samīhanta ||

¹² śrayate suvarṇabhāvaṃ siddharasasparśato yathā loham |

ātmadhyānād ātmā paramātmatvaṃ tathāpnoti ||

¹³ janmāntarasaṃskārāt svayam eva kila prakāśate tattvam |

suptotthitasya pūrvapratyayavan nirupadeśam api ||

¹⁴ athavā guruprasādād ihaiva tattvaṃ samunmiṣati nūnam |

gurucaraṇopāstikṛtaḥ praśamajuṣaḥ śuddhacittasya ||

¹⁵ tatra prathame tattvajñāne saṃvādako gurur bhavati |

darśayitā tv aparasmin gurum eva sadā bhajet tasmāt ||

¹⁶ yadvat sahasrakiraṇaḥ prakāśako nicitatimiramagnasya |

tadvad gurur atra bhaved ajñānadhvāntapatitasya ||

¹⁷ prāṇāyāmaprabhṛtikleśaparityāgatas tato yogī |

upadeśaṃ prāpya guror ātmābhyāse ratiṃ kuryāt ||

¹⁸ vacanamanaḥkāyānāṃ kṣobhaṃ yatnena varjayec chāntaḥ |

rasabhāṇḍam ivātmānaṃ suniścalaṃ dhārayen nityam ||

¹⁹ audāsīnyaparāyaṇavṛttiḥ kiñcid api cintayen naiva |

yat saṃkalpākulitaṃ cittaṃ nāsādayet sthairyam ||

²⁰ yāvat prayatnaleśo yāvat saṅkalpakalpanā kāpi |

tāvan na syāpi prāptis tattvasya kā tu kathā ||

²¹ yad idaṃ tad iti na vaktuṃ sākṣād guruṇāpi hanta śakyeta |

audāsīnyaparasya prakāśate tat svayaṃ tattvam ||

²² ekānte ’tipavitre ramye deśe sadā sukhāsīnaḥ |

ācaraṇāgraśikhāgrācchithilībhūtākhilāvayavaḥ ||

²³ rūpaṃ kāntaṃ paśyann api śṛṇvann api giraṃ kalamanojñām |

jighrann api ca sugandhīny api bhuñjāno rasān svādūn ||

²⁴ bhāvān spṛśann api mṛdūn avārayann api ca cetaso vṛttim |

parikalitaudāsīnyaḥ pranaṣṭaviṣayabhramo nityam ||

²⁵ bahir antaś ca samantāc cintāceṣṭāparicyuto yogī |

tanmayabhāvaṃ prāptaḥ kalayati bhṛśam unmanībhāvam ||

²⁶ gṛhṇantu grāhyāṇi svāni svānīndriyāṇi no rundhyāt |

na khalu pravartayed vā prakāśate tattvam acireṇa ||

²⁷ ceto ’pi yatra yatra pravartate no tatas tato vāryam |

adhikībhavati hi vāritam avāritaṃ śāntim upayāti ||

²⁸ matto hastī yatnān nivāryamāṇo ’dhikībhavati yadvat |

anivāritas tu kāmān labdhvā śāmyati manas tadvat ||

²⁹ yarhi yathā yatra yataḥ sthirībhavati yoginaś calaṃ cetaḥ |

tarhi tathā tatra tataḥ kathañcid api cālayen naiva ||

³⁰ anayā yuktyābhyāsaṃ vidadhānasyātilolam api cetaḥ |

aṅgulyagrasthāpitadaṇḍaiva sthairyam āśrayati ||

³¹ niḥsṛty ādau dṛṣṭiḥ saṃlīnā yatra kutracit sthāne |

tatrāsādya sthairyaṃ śanaiḥ śanair vilayam āpnoti ||

³² sarvatrāpi prasṛtā pratyagbhūtā śanaiḥ śanair dṛṣṭiḥ |

paratattvāmalamukure nirīkṣate hy ātmanātmānam ||

³³ audāsīnyanimagnaḥ prayatnaparivarjitaḥ satatam ātmā |

bhāvitaparamānandaḥ kvacid api na mano niyojayati ||

³⁴ karaṇāni nādhitiṣṭhaty upekṣitaṃ cittam ātmanā jātu |

grāhye tato nijanije karaṇāny api na pravartante ||

³⁵ nātmā prerayati mano na manaḥ prerayati yarhi karaṇāni |

ubhayabhraṣṭaṃ tarhi svayam eva vināśam āpnoti ||

³⁶ naṣṭe manasi samantāt sakale vilayaṃ ca sarvato yāte |

niṣkalam udeti tattvaṃ nirvātasthāyidīpa iva ||

³⁷ aṅgamṛdutvanidānaṃ svedanamardanavivarjanenāpi |

snigdhīkaraṇam atailaṃ prakāśamānaṃ hi tattvam idam ||

³⁸ amanaskatayā saṃjāyamānayā nāśite manaḥśalye |

śithilībhavati śarīraṃ chatram iva stabdhatāṃ tyaktvā ||

³⁹ śalyībhūtasyāntaḥkaraṇasya kleśadāyinaḥ satatam |

amanaskatāṃ vinānyad viśalyakaraṇauṣadhaṃ nāsti ||

⁴⁰ kadalīvac cāvidyā lolendriyapattralā manaḥkandā |

amanaskaphale dṛṣṭe naśyati sarvaprakāreṇa ||

⁴¹ aticañcalam atisūkṣmaṃ durlakṣaṃ vegavattayā cetaḥ |

aśrāntam apramādād amanaskaśalākayā bhindyāt ||

⁴² viśliṣṭam iva pluṣṭam ivoḍḍīnam iva pralīnam iva kāyam |

amanaskodayasamaye yogī jānāty asatkalpam ||

⁴³ samadair indriyabhujagai rahite vimanaskanavasudhākuṇḍe |

magno ’nubhavati yogī parāmṛtāsvādam asamānam ||

⁴⁴ recakapūrakakumbhakakaraṇābhyāsakramaṃ vināpi khalu |

svayam eva naśyati marud vimanaske saty ayatnena ||

⁴⁵ ciram āhitaprayatnair api dhartuṃ yo hi śakyate naiva |

saty amanaske tiṣṭhati sa samīras tatkṣaṇād eva ||

⁴⁶ yāte ’bhyāse sthiratām udayati vimale ca niṣkale tattve |

mukta iva bhāti yogī samūlam unmūlitaśvāsaḥ ||

⁴⁷ yo jāgradavasthāyāṃ svasthaḥ supta iva tiṣṭhati layasthaḥ |

śvāsocchvāsavihīnaḥ sa hīyate na khalu muktijuṣaḥ ||

⁴⁸ jāgaraṇasvapnajuṣo jagatītalavartinaḥ sadā lokāḥ |

tattvavido layamagnā no jāgrati śerate nāpi ||

⁴⁹ bhavati khalu śūnyabhāvaḥ svapne viṣayagrahaś ca jāgaraṇe |

etad dvitayam atītyānandamayam avasthitaṃ tattvam ||

⁵⁰ karmāṇy api duḥkhakṛte niṣkarmatvaṃ sukhāya viditaṃ tu |

na tataḥ prayateta kathaṃ niṣkarmatve sulabhamokṣe ||

⁵¹ mokṣo ’stu māstu yadivā paramānandas tu vidyate sa khalu |

yasmin nikhilasukhāni pratibhāsante na kiñcid iva ||

⁵² madhu na madhuraṃ naitāḥ śītās tviṣas tuhinadyuter

amṛtam amṛtaṃ nāmaivāsyāḥ phale tu mudhā sudhā |

tad alam amunā saṃrambheṇa prasīda sakhe manaḥ

phalam avikalaṃ tvayy evaitat prasādam upeyuṣi ||

⁵³ saty etasminn aratiratidaṃ gṛhyate vastu dūrād

apy āsanne ’py asati tu manasy āpyate naiva kiñcit |

puṃsām ity apy avagatavatām unmanībhāvahetāv

icchā bāḍham na bhavati kathaṃ sadgurūpāsanāyām ||

⁵⁴ tāṃs tān ā parameśvarād api parān bhāvaiḥ prasādaṃ nayan

tais tais tat tadupāyamūḍha bhagavann ātman kim āyasyasi |

hantātmānam api prasādaya manāg yenāsatāṃ saṃpadaḥ

sāmrājyaṃ parame ’pi tejasi tava prājyaṃ samujjṛmbhate ||

⁵⁵ yā śāstrāt suguror mukhād anubhavāc cājñāyi kiñcit kvacid

yogasyopaniṣad vivekipariṣaccetaścamatkāriṇī |

śrīcaulukyakumārapālanṛpater atyartham abhyarthanād

ācāryeṇa niveśitā pathi girāṃ śrīhemacandreṇa sā ||